កាលពីព្រេងនាយមានកុមារម្នាក់នៅជាមួយម្តាយ ចិញ្ចឹមជ្រូកកម្រៀវ ១
ដល់ជ្រូកនោះធំឡើងក្មេងនោះចង់ស៊ីសាច់ជ្រូក ក៏និយាយនឹងម្តាយថា
"ម៉ែខ្ញុំចង់ស៊ីសាច់ជ្រូក ម៉ែឲ្យខ្ញុំកាប់ជ្រូកនេះស៊ីផឹកស្រាទៅ?" ។
ម្តាយឃាត់ថា "កុំ! ឯងស៊ីអ្វីក៏ច្រើនម្ល៉េះ ទុកវានឹងលក់យកប្រាក់ចាយ"
។ កូនឮម្តាយឃាត់ដូច្នោះ ក៏នឹកតែក្នុងចិត្តចង់ស៊ីសាច់ជ្រូកតែសព្វថ្ងៃ
ពុំមានភ្លេច ។ មានកាលមួយថ្ងៃ កូននោះភ្ញាក់ឡើងពីដេកនិយាយប្រាប់ម្តាយថា
"ដ្បិតទេវតាប្រាប់ខ្ញុំថា "មានមាសច្រើនណាស់ ម៉ែជូនខ្ញុំទៅយក" ។
ម្តាយឮកូននិយាយប្រាប់ដូច្នោះ សួរថា "មាសប្រាក់នៅឯណា?" ។ កូនឆ្លើយថា
"ម៉ែទៅនឹងខ្ញុំចុះ បើខ្ញុំបង្គាប់ដូចម្តេចម៉ែធ្វើតាមខ្ញុំ" ។
កូនយកកញ្ជើនាំម្តាយដើរទៅព្រៃឆ្ងាយអំពីស្រុក
ហើយកូនក៏យកកញ្ជើស្ទុះទៅគ្របលើដី ប្រឹងសង្កត់ហើយប្រាប់ម្តាយថា
"ម៉ែជួយសង្កត់ផង មាសប្រាក់នៅក្នុងដីនេះច្រើនណាស់
ម៉ែសង្កត់ឲ្យជាប់ចុះខ្ញុំនឹងទៅរកចបជីកយកមាសប្រាក់
ម៉ែឯងនៅសង្កត់ឲ្យជាប់កុំលែងមាសប្រាក់នឹងបាត់បង់អស់ទៅ" ។
ឯម្តាយឮកូនថាដូច្នោះ ក៏ខំសង្កត់កញ្ជើនោះចាំកូន កូនក៏ត្រឡប់ទៅផ្ទះវិញ
ចាប់ជ្រូកនោះយកមកកាប់ចម្អិនជាអាហារ
បបួលអស់បងប្អូនជិតខាងមកស៊ីផឹកស្រាលេងសប្បាយ ។
ម្តាយនៅឯព្រៃចាំកូនឯព្រៃទន្ទឹងពុំឃើញមក ឃ្លានបាយអស់កម្លាំង
រោយដៃរោយជើង របូតចេញពីលើកញ្ជើ មើលក្នុងកញ្ជើពុំឃើញមានអ្វីសោះ ។
លុះម្តាយដឹងថាកូនបញ្ឆោតហើយ ក៏ត្រឡប់ទៅផ្ទះវិញ
ឃើញកូនកំពុងតែស៊ីសាច់ជ្រូកផឹកស្រាលេងសប្បាយដូច្នោះ ខឹងនឹងកូនណាស់
ហើយនិយាយនឹងប្អូនថា "ដ្បិតកូននេះខូចណាស់ ទុកចិញ្ចឹមមិនបានទេ
ត្រូវឯងច្រកការុងយកទៅទម្លាក់ក្នុងទឹកសម្លាប់ទៅ" ។
ប្អូនឮដូច្នេះក៏សួរថា
"ដំណើរដូចម្តេចបានជាឲ្យយកកូនច្រកការុងទៅចោលក្នុងទឹកសំលាប់?" ។
បងនិយាយប្រាប់ទៅប្អូនតាមដំណើរសព្វគ្រប់ថា
"វាចេះបញ្ឆោតឲ្យអញទៅក្នុងព្រៃ ថាទៅយកមាសប្រាក់
ហើយវាឲ្យអញចាំនៅក្នុងព្រៃ លុះត្រាតែដល់ថ្ងៃ ឃ្លានបាយស្ទើរតែដាច់ពោះ
ឯវាមកកាប់ជ្រូកផឹកស្រា ជ្រូកអញតែមួយទុកលក់ឲ្យគេយកប្រាក់ចាយទេតើ"
ប្អូននោះក៏ទៅចាប់អាកុហកស៊ីច្រកក្នុងការុងធំ ចងមាត់ការុងជាប់ល្អ
លើលីយកទៅនឹងចោលក្នុងទឹកទន្លេ
លុះដល់មាត់ទន្លេអាកុហកស៊ីនិយាយនឹងមាវាថា
"លោកមាអាណិតខ្ញុំៗមុខជាស្លាប់ហើយ
បើដូច្នេះសូមលោកមាអាណិតទៅយកក្បួនកុហកឲ្យខ្ញុំបន្តិច
ដ្បិតខ្ញុំស្លាប់ហើយទៅៗនៅឋានខ្មោច បើគ្មានក្បួនកុហកខ្មោចរកស៊ីពុំបាន
នោះនឹងដាច់ពោះស្លាប់" ឯមាឮក្មួយអង្វរដូច្នោះក៏សួរទៅក្មួយថា
"ក្បួនកុហកឯងទុកនៅទីណា?" ។ ក្មួយប្រាប់ទៅមាថា
"ខ្ញុំដាក់នៅលើធ្នឹម" ។ មាក៏ដាក់អាកុហកស៊ីនៅកំពង់ទឹក
ហើយត្រឡប់ទៅយកក្បួនភរអាកុហកស៊ីវិញ ។
កាលនោះមានមនុស្សកើតឃ្លង់ម្នាក់ដើរមកជិតអាកុហកស៊ីៗក៏ធ្វើជានិយាយថា
"អញមកតមឃ្លង់ក្នុងការុងនេះយូរថ្ងៃហើយ មិនដឹងជាៗហើយឬនៅ
ប៉ុន្តែស្ទាបមើលហាក់ដូចសះជាហើយ" ។ មនុស្សឃ្លង់ឮអាកុហកស៊ីថា
តមឃ្លង់ក្នុងការុងដូច្នោះ ដោយខ្លួនកើតឃ្លង់ក៏សួរថា
"តមឃ្លង់ក្នុងការុងនេះបានជាឬ?" ។ អាកុហកស៊ីប្រាប់ថា
"ដ្បិតខ្ញុំកើតឃ្លង់ គេឲ្យមកតមក្នុងការុងនេះយូរថ្ងៃហើយ
មិនដឹងជាជាហើយឬនៅទេ អាណិតស្រាយខ្ញុំបន្តិច" ។
មនុស្សឃ្លង់ក៏ស្រាយមាត់ការុងឲ្យអាកុហកស៊ីចេញមក ។ អាកុហកស៊ី
ចេញអំពីការុងបោសខ្លួនមើលហើយប្រាប់ថា "ជាឃ្លង់ហើយ" ។
អាគម្លង់ឮអាកុហកស៊ីថា តមឃ្លង់ក្នុងការុងដូច្នោះក៏និយាយថា
"ឲ្យគ្នាតមឃ្លង់ផង" ។ អាកុហកស៊ីឮដូច្នោះអរណាស់គិតថា
"អញអស់ស្លាប់ហើយ បានអាគម្លង់ស្លាប់ជួស" ។ អាកុហកស៊ី
ប្រាប់អាគម្លង់ថា "បើឯងចង់ជាឃ្លង់ឆាប់ ត្រូវកាន់ត្រណមឲ្យជាប់
កុំនិយាយស្តីនឹងអ្នកណាឲ្យសោះ បើនរណាមកសួរក្តីមកជេរវាយដូចម្តេចៗក្តី
ត្រូវកុំនិយាយស្តី ខំកាន់ត្រណមឲ្យខ្ជាប់ទើបបានជាឆាប់" ។
អាគម្លង់ឮអាកុហកស៊ីថាដូច្នោះក៏ទទួលចាំ ហើយចូលទៅក្នុងការុង ។
អាកុហកស៊ីចងមាត់ការុងជាប់ ហើយរត់បាត់ទៅ
មានោះរកតម្រាឲ្យអាកុហកស៊ីពុំឃើញ ដឹងថា អាកុហកស៊ីបញ្ឆោតខ្លួនខឹងណាស់
ក៏គិតក្នុងចិត្តថា "បើអញទៅដល់អញនឹងទម្លាក់វាទៅក្នុងទឹកឲ្យស្លាប់ទៅ"
ហើយខំដើរទៅដល់ហើយក៏ស្ទុះចូលទៅ ដាល់វាយ ឯគម្លង់ដោយស្មានថា អាកុហកស៊ី ។
អាគម្លង់ខំអត់ព្រោះចង់ជាឃ្លង់ លុះវាយធាក់អស់ចិត្តហើយ
ក៏លើកការុងបោះទៅក្នុងទឹកឲ្យស្លាប់ទៅ ។
អាកុហកស៊ីរត់រួចអំពីនោះទៅៗជួបនឹងមនុស្សកុហកម្នាក់ ចេះកុហកដូចគ្នា កំពុងតែមុជទឹក អាកុហកស៊ី នោះឃើញអាកុហកស៊ីដើរទៅពីចំងាយ ក៏វាធ្វើជាមុជទឹក យូរបន្តិចងើបឡើង ហើយលើកកាសឡើងថា អញមុជទឹកទៅខាងក្រោមមានគេលេងបៀរ អញលេងឈ្នះបានកាសប្រាក់ច្រើន ប៉ុន្តែយកមិនរួច បានតែមួយត្រណោតមក ។ អាកុហកស៊ីឮដូច្នោះ ក៏ជឿគិតស្មានថាមែន ហើយក៏ផ្លាស់សំពត់លោតទៅក្នុងទឹក ខំមុជទៅទង្គិចក្បាលនឹងគល់ឈើបែកឈាម ដឹងខ្លួនថាគេជាមនុស្សកុហក ក៏នឹកក្នុងចិត្តឃើញឧបាយកុហកវិញ ហើយងើបឡើងនិយាយទៅអាដែលបញ្ឆោតនោះថា "អ្នកអើយ! ខ្ញុំមុជទឹកទៅតាមពាក្យអ្នកឯងអម្បាញ់ម៉ិញ បានឃើញគេលេងបៀរប៉ាធួកំតាត់ច្រើនណាស់ ហើយខ្ញុំលេងឈ្នះគេ បានប្រាក់កាសច្រើន ខ្ញុំទារពីគេៗថា ឲ្យយកពីឯងនោះ ខ្ញុំមិនព្រមខ្ញុំចេះតែទារ គេខឹងនឹងខ្ញុំ គេវាយខ្ញុំបែកក្បាល ហើយគេថា ឲ្យខ្ញុំមកយកពីអ្នកឯង បើអ្នកឯងមិនជឿមើលក្បាលខ្ញុំដែលបែកនេះចុះ" ។ អាកុហកស៊ីនោះដឹងថា អាកុហកស៊ីមានប្រាជ្ញាចេះកុហកមិនចាញ់ខ្លួន ក៏ស្រាយកាសចែកគ្នាពាក់កណ្តាល ហើយសុំគ្នាជាបងប្អូនដើររកស៊ីកុហកគេតាំងអំពីនោះតទៅ ៕
អាកុហកស៊ីរត់រួចអំពីនោះទៅៗជួបនឹងមនុស្សកុហកម្នាក់ ចេះកុហកដូចគ្នា កំពុងតែមុជទឹក អាកុហកស៊ី នោះឃើញអាកុហកស៊ីដើរទៅពីចំងាយ ក៏វាធ្វើជាមុជទឹក យូរបន្តិចងើបឡើង ហើយលើកកាសឡើងថា អញមុជទឹកទៅខាងក្រោមមានគេលេងបៀរ អញលេងឈ្នះបានកាសប្រាក់ច្រើន ប៉ុន្តែយកមិនរួច បានតែមួយត្រណោតមក ។ អាកុហកស៊ីឮដូច្នោះ ក៏ជឿគិតស្មានថាមែន ហើយក៏ផ្លាស់សំពត់លោតទៅក្នុងទឹក ខំមុជទៅទង្គិចក្បាលនឹងគល់ឈើបែកឈាម ដឹងខ្លួនថាគេជាមនុស្សកុហក ក៏នឹកក្នុងចិត្តឃើញឧបាយកុហកវិញ ហើយងើបឡើងនិយាយទៅអាដែលបញ្ឆោតនោះថា "អ្នកអើយ! ខ្ញុំមុជទឹកទៅតាមពាក្យអ្នកឯងអម្បាញ់ម៉ិញ បានឃើញគេលេងបៀរប៉ាធួកំតាត់ច្រើនណាស់ ហើយខ្ញុំលេងឈ្នះគេ បានប្រាក់កាសច្រើន ខ្ញុំទារពីគេៗថា ឲ្យយកពីឯងនោះ ខ្ញុំមិនព្រមខ្ញុំចេះតែទារ គេខឹងនឹងខ្ញុំ គេវាយខ្ញុំបែកក្បាល ហើយគេថា ឲ្យខ្ញុំមកយកពីអ្នកឯង បើអ្នកឯងមិនជឿមើលក្បាលខ្ញុំដែលបែកនេះចុះ" ។ អាកុហកស៊ីនោះដឹងថា អាកុហកស៊ីមានប្រាជ្ញាចេះកុហកមិនចាញ់ខ្លួន ក៏ស្រាយកាសចែកគ្នាពាក់កណ្តាល ហើយសុំគ្នាជាបងប្អូនដើររកស៊ីកុហកគេតាំងអំពីនោះតទៅ ៕
អាត្រាប្តូរប្រាក់រៀលថ្ងៃនេះ
0 comments:
Post a Comment