ការប្រើប្រាស់ថ្មកំបោរ (Calcium Carbonate) ~ Leak4learn

Monday, July 02, 2012

ការប្រើប្រាស់ថ្មកំបោរ (Calcium Carbonate)

10:24:00 PM leaklifes.blogspot.com No comments

ថ្មកំបោរ (ភាសារអង់គ្លេសហៅថា Lime, Lime store, aglime) គឺជាគ្រឿងផ្សំសម្រាប់កែ PH របស់ដី។ ថ្មកំបោរត្រូវបានគេកិនឲ្យម៉ដ្ឋច្រកដាក់ថង់ទម្ងន់ ១០គីឡូក្រាម លក់នៅតាមដេប៉ូលក់ចំណីសត្វ និងកន្លែងមួយចំនួនទៀត តែសូមកុំច្រឡំវាជាមួយថ្មកំបោរម្យ៉ាងទៀតសម្រាប់យកមកលាបផ្ទះ ព្រោះពីរនេះត្រូវបានយកមកប្រើក្នុងន័យខុសគ្នា និងប្រយោជន៍ផ្សេងគ្នា។
ថ្មកំបោរសម្រាប់កសិកម្មមានពណ៌ក្រម៉ៅ ឬពណ៌ប្រផេះ ឯថ្មកំបោរសម្រាប់បាចបាតស្រះ ឬសម្រាប់លាបផ្ទះមានពណ៌ស។ ក្នុងករណីខ្លះថ្មកំបោរសម្រាប់ប្រើក្នុងវិស័យកសិកម្មនេះ មានពណ៌សដែរ តែមិនល្អដូចជាថ្មកំបោរមានពណ៌ប្រផេះនោះឡើយ។
ហេតុអ្វីបានជាយើងចាំបាច់ត្រូវប្រើថ្មកំបោរក្នុងវិស័យកសិកម្ម?
គ្រប់ដីទាំងអស់ តែងមានកម្រិត PH របស់វាមិនដូចគ្នាទេ ដូច្នេះអ្នកដាំដំណាំចាំបាច់ណាស់ត្រូវរកមធ្យោបាយវាស់ PH របស់ដី ដែលត្រៀមសម្រាប់ប្រើ ឬក៏កំពុងប្រើជាមុនសិន ដើម្បីឲ្យដឹងថា តើវាមានកម្រិត PH របស់វាក្នុងកម្រិតប៉ុន្មាន? ក្រៅពីនេះអ្នកដាំត្រូវដឹងថាដំណាំសម្រាប់យកមកដាំឈើដីនោះ តម្រូវឲ្យដីត្រូវមានកម្រិត PH របស់ដីក្នុងកម្រិតណាដែរ? នោះទើបដំណាំដែលយកមកដាំ និងដីដែលត្រៀមសម្រាប់ដាំ វាត្រូវគ្នា។
ជាទូទៅដំណាំត្រូវការដីដែលមានកម្រិត PH ពី ៤-៥ ទៅ 6.5 នេះ គឺជាកម្រិតមិនមានអាស៊ីដពេក និងមិនអាល់កាឡាំងពេក គឺវាស្ថិតក្នុងកម្រិតមធ្យម (Neutral)។
មួយវិញទៀតនោះ យើងមិនចាំបាច់ត្រូវដឹងថា ដំណាំវាត្រូវការដី PH ប៉ុន្មាននោះឡើយ តែយើងត្រូវកែ PH របស់ដីឲ្យទៅជាណឺត (Neutral) នោះក៏ចាការល្អម្យ៉ាងដែរ ព្រោះវាសមស្របសម្រាប់ដំណាំភាគច្រើន ដូចនេះការដាក់ថ្មកំបោរ ដើម្បីកែដី គឺអាស្រ័យដោយប្រភេទនៃដីទាំងស្រុង។ សូមមើលពីចំនួនថ្មកំបោរដែលត្រូវការសម្រាប់ប្រភេទដីដូចខាងក្រោម :
ប្រភេទដី ដីមាន PH 4.5-5.5 ដីមាន PH 5.5-6.5
ត្រូវការថ្មកំបោរចំនួន ត្រូវការថ្មកំបោរចំនួន
ដីខ្សាច់ និង ខ្សាច់ល្បាយ ៥០០ គ.ក/ហិកតា ៧៥០ គ.ក/ហិកតា
ខ្សាច់ល្បាយ ១០០០ គ.ក/ហិកតា ១៥០០ គ.ក/ហិកតា
ដីល្បាយខ្សាច់តិចៗ ១៥០០ គ.ក/ហិកតា ២០០០ គ.ក/ហិកតា
ដីកណ្តេងលាយខ្សាច់ ២៥០០ គ.ក/ហិកតា ៣០០ គ.ក/ហិកតា
ដីឥដ្ឋល្បាយកណ្តេង ៣០០០ គ.ក/ហិកតា ៤០០០ គ.ក/ហិកតា
ការប្រើប្រាស់ថ្មកំបោរ ដើម្បីកែកម្រិត PH អាចធ្វើម្តងរៀងរាល់ពីរទៅបីឆ្នាំម្តងជាមធ្យម ការផ្លាស់ប្តូរកម្រិត PH របស់ដីអាច កើតមានបន្ទាប់ពីបានដាក់ថ្មកំបោរបានពីរទៅបីឆ្នាំដែរ។ ការផ្លាស់ប្តូរកម្រិត PH របស់ដីអាចកើតឡើងខ្លះ បន្ទាប់ពីថ្មកំបោរបានជ្រាបចូលក្នុងដី ដោយសារភ្លៀង ឬដោយសារការស្រោចទឹក។
យើងអាចប្រើថ្មកំបោរនៅពេលណាក៏បាន ប៉ុន្តែពេលវេលាដែលល្អបំផុតនោះ គឺនៅពេមុនចាប់ផ្តើមភ្ជួរ។ ថ្មកំបោរគួរត្រូវបានបាចនៅលើដីនាពេលល្ងាចត្រជាក់ ឬពេលព្រឹក ត្រូវបាចឲ្យសព្វលើផ្ទៃដី ដែលត្រូវប្រើការ បន្ទាប់មកទើបភ្ជួរលុបវាជាក្រោយ។
ថ្មកំបោរបើបានប្រើឲ្យបានត្រឹមត្រូវ វាអាចជួយឲ្យដំណាំបង្កើនទិន្នផល ការដុះលូតលាស់របស់ដំណាំមានលក្ខណៈប្រសើរជាងការដែលមិនបានប្រើ។
ការផ្លាស់ប្តូរពីការធ្វើដោយស្មានៗ មកជាការធ្វើកសិកម្មមួយមានបទដ្ឋានបច្ចេកទេសត្រឹមត្រូវ អាចធានាបាននូវនិរន្តភាពនៃកសិកម្មមួយ ដែលលូតលាស់ទៅមុខ ជួយបង្កើបរិមាណកសិផល បង្កើនចំណូលដល់អ្នកដាំ និងបង្កើនចំណេះដឹងដល់កសិករ។
ការដាំដំណាំដែលប្រកាន់យកតាមទម្លាប់ មិនអាចជួយឲ្យវិស័យកសិកម្មអភិវឌ្ឍន៍ទៅមុខបានឡើយ ទោះជាក្នុងរូបភាពបែបគ្រួសារក្តី បែបកសិកម្មខ្នាតធំក្តី ចាំបាច់ណាស់ត្រូវមានបច្ចេកទេសមួយសមស្រប ដែលអាចជួយបង្កើនទិន្នផល និងរក្សាបាននូវគុណភាពដី៕